قازاقستاننىڭ ەڭبەك سىڭىرگەن مادەنيەت قىزمەتكەرى، مەملەكەت جانە قوعام قايراتكەرى  ءلايلا عالي قىزى دۇنيەدەن وزدى، دەپ حابارلايدى Qamshy.kz اقپارات اگەنتتىگى مادنيەت جانە سپورت مينيسترلىگى باسپا ءسوز قىزمەتىنە سىلتەمە جاساپ.

ول ەڭبەك جولىن اكتريسالىقتان باستاپ، سەناريست، تەليەۆيدەنيە رەجيسسەرى، قاز سسر كينەماتوگرافيا جونىندەگى مەملەكەتتىك كوميتەتتىڭ ءتورايىمى، مادەنيەت ءمينيسترىنىڭ ورىنباسارى، (1977-1981) مينيستر لاۋازىمدارىن ابىرويمەن اتقاردى.

ءلايلا عالي قىزى عالىمجانوۆانى اقتىق ساپارعا شىعارىپ سالۋ شاراسى الماتىداعى جامبىل اتىنداعى فيلارمونيادا دۇيسەنبى كۇنى ساعات 10:00-دا وتەدى.  

ءلايلا عالي قىزى عالىمجانوۆا - قازاقستان اكتريساسى، سەنارييشى، تەليەۆيدەنيە رەجيسسەرى.

1924 جىلى پەتروپاۆل ماڭىندا تۋعان، قازاقستاننىڭ ەڭبەك سىڭىرگەن مادەنيەت قىزمەتكەرى، مەملەكەت جانە قوعام قايراتكەرى.

اكەسى رەپرەسسياعا ۇشىراپ، اناسى سىرقاتتان ەرتە قايتىس بولدى. ءلايلا عالي قىزى تۋىستارىنىڭ ۇيىندە تاربيەلەنگەن.

ماسكەۋدە بمكي-دە (بۇكىلوداقتىق مەملەكەتتىك كينەماتوگرافيا ينستيتۋتى) ءبىلىم العان. وقۋ بىتىرگەن سوڭ الماتىدا جاس كورەرمەندەر تەاترىنا قابىلدانادى. الايدا تەاتردا كوپ تۇراقتاي العان جوق. ول ادەبيەت جانە ونەر ينستيتۋتىنا اسپيرانتۋراعا وقۋعا ءتۇسىپ، مۇحتار اۋەزوۆتەن ءتالىم الادى. الايدا بۇل وقۋ ورنىنان دا ءتۇرلى سەبەپتەرمەن شىعىپ قالادى.

كينوداعى دەبيۋتى "التىن ءمۇيىز" فيلمىنەن باستالادى. وسى فيلمگە ءتۇسىپ جۇرگەن كەزىندە لەيتەنانت-ارتيللەريست زيا ابدوللا ۇلى قاراۋلوۆقا كۇيەۋگە شىعادى. ەكەۋى ۇزاق جىلدار بويى – 2001 جىلعا دەيىن باقىتتى وتباسى ءسۇرىپ كەلدى. ءبىر ۇل، ءبىر قىز ءوسىردى.

العاشقى رولدەن كەيىن اكتريسانى كينوستۋديانىڭ سەنارلىق بولىمىنە رەداكتور ەتىپ شاقىرادى. قىزمەت ات­قارا ءجۇرىپ جازعان «جوعارى دارەجەلى قىزمەت» دەگەن سەنارييى جابىق بايقاۋعا ءتۇسىپ، ەكىنشى جۇلدەنى جەڭىپ الادى. كوللەكتيۆتەگى قارىم-قاتىناستاردا كەلەڭسىز جاعدايلار (ينتريگا) بولماسىن دەپ اۆتور ءوز تۋىندىسىن «تاجىكفيلم» كينوستۋدياسىنا قويۋعا بەرەدى. قايتا وسىدان كەيىن بۇل شەشىمدى ساتقىندىق دەپ ەسەپتەگەندەر دە تابىلىپ، ءارى قاراي جۇمىس ىستەۋگە مۇمكىن بولماي قالادى. سەناريي جازا الاتىندىعىنا سەنگەن ءلايلا عالي قىزى تاعى سەناريي جازۋعا وتىرادى. «شەتتەگى كەش» اتتى سەنا­ريي جازىپ بىتىرەدى. ءبىر توپ اڭگىمەلەر جازىپ م.و. اۋەزوۆكە ۇسى­نادى، وقىپ شىققان ۇستاز: «سەنىڭ قولىڭ جەڭىل. ءسوز­دەر­ءدى دۇرىس قولداناسىڭ، ولاردىڭ ناقتى ورىندارىن تابا بىلەسىڭ. كەيىپكەرلەرىڭ سەنىم تۋعىزادى، ولار ۇنامدى. جاز!»، – دەيدى…

ءلايلا عالىمجانوۆانى ءومىر قىزمەت ساتىلارىمەن ارباپ اكەتە بەرەدى. جاڭا باس كوتەرىپ كەلە جاتقان قازاق تەليەۆيزياسىنىڭ العاشقى باس رەجيسسەرى قىزمەتىنە تاعايىندالادى، كەيىن مادەنيەت ءمينيسترىنىڭ ورىنباسارى، ءمينيسترى. قازاق ءسسر-ى مينيسترلەر كەڭەسىنىڭ مادەنيەت ءبولى­ءمىنىڭ مەڭگەرۋشىسى (1959-1977)، كينەماتوگرافيا جونىندەگى مەملەكەتتىك كوميتەتتىڭ ءتورايىمى (1977-1981) بولدى.